ایشیاء کپ:دبئی کر کٹ اسٹیڈیم میں تیاریاں مکمل کرلی گئیں




دبئی(زمونگ سوات ڈاٹ کام)ایشیاء کپ کی میزبانی کیلئے متحدہ عرب امارات کے دبئی اسٹیڈیم میں تیاریاں مکمل کرلی گئی ہیں ۔ایشیا کپ کرکٹ ٹورنامنٹ کا 15ستمبر کو آغاز ہوگا۔ تمام میچز دبئی اور ابوظہبی میں کھیلے جائیں گے۔ دبئی اسپورٹس سٹی کے منیجر سلمان حنیف کا کہنا ہے کہ اہم ٹورنامنٹ کی میزبانی یواے ای کیلئے قابل فخر موقع ہوگا، کرکٹ اسٹیڈیم کی اپ گریڈیشن پر بھاری سرمایہ خرچ کیا گیا ہے۔ ایونٹ کیلئے خصوصی طور پر 2نئی پچز بنانے کے ساتھ نئی ری پلے اسکرینز اور ڈیجیٹل اسکور بورڈ بھی نصب کردیے گئے ہیں۔ ڈریسنگ روم میں کھلاڑیوں کو سہولیات فراہم کرنے کیلئے بھی کام کیا گیا ہے۔انھوں نے کہا کہ ٹریفک کے رش سے بچنے کیلئے اسٹیڈیم کے اطراف میں پارکنگ کا نظام بہتر بنا دیا گیا ہے۔ میڈیاکے ساتھ اس بار تماشائیوں کیلئے فری شٹل بھی دستیاب ہوگی۔ دوسری جانب ٹیموں کے پریکٹس سیشنز کیلئے آئی سی سی اکیڈمی میں موجود سہولیات میں بھی اضافہ کیا گیا ہے۔جنرل منیجر ول کچن نے کہاکہ ایشیا کپ میں شریک6ٹیموں کو یہاں ٹریننگ کرنا ہے۔اسی لحاظ سے انتظامات بھی زیادہ ہونے چاہئیں،وینیو کی تزئین و آرائش کا کام مکمل کیا جا چکا ہے۔ پریکٹس اور اسٹیڈیم میں بنائی گئی پچز ایک جیسی ہیں، یکساں کنڈیشنز کی وجہ سے کرکٹرز کو ماحول سے مطابقت حاصل کرنے میں مشکل پیش نہیں آئے گی۔انھوں نے کہا کہ زیادہ ٹیموں کو پیش نظر رکھتے ہوئے مہمان بیٹسمینوں کو نیٹ پریکٹس کرانے کیلئے بولرز کی تعداد بھی بڑھا دی جائے گی۔اسٹیڈیم میں بال بوائے اکیڈمی کے نوجوان کرکٹرز ہوں گے۔




ایک تبصرہ شامل کریں…
0 Likes
61 مناظر