کپتان ڈیرن سیمی نے ساتھی کھلاڑی کرس گیل کو صاف گو قرار دیدیا

ٹی ٹوئنٹی کرکٹ کی عالمی چمپئن ویسٹ انڈیز کے کپتان ڈیرن سیمی نے ساتھی کھلاڑی کرس گیل کو صاف گو قرار دیتے ہوئے کہا کہ وہ اپنی بے باک گفتگو کے باعث میڈیا کا آسان ہدف بن جاتے ہیں۔میڈیا رپورٹ کے مطابق ڈیرن سیمی ورلڈ ٹی ٹوئنٹی میں فتح کے بعد پہلی دفعہ کرکٹ کھیلنے انگلش کاؤنٹی کلب ہمشائر پہنچے ہیں جہاں وہ نیٹ ویسٹ ٹی ٹوئنٹی ٹورنامنٹ میں شرکت کریں گے۔ڈیرن سیمی نے کہاکہ میرے خیال میں لوگ کرس گیل کو بلاوجہ نشانہ بنا رہے ہیں وہ میری ٹیم کے ایسے ساتھی ہیں جن کی میں تعریف اور احترام کرتا ہوں، وہ فطری کپتان ہیں۔ویسٹ انڈیز کو دو دفعہ ٹی ٹوئنٹی کا عالمی چمپئن بنانے والے سیمی نے کہا کہ گیل میرے لیے سب سے پہلے کرکٹ ہیرو اور محظوظ کرنے والے شخص ہیں تاہم لوگ بلاوجہ ان پرتنقید کرتے ہیںآسٹریلیا کی بگ بیش لیگ کی ٹیم میلبورن رینیگیڈز نے کرس گیل کو نئے سیزن میں ٹیم کا حصہ نہ بنانے کا اعلان کیا تھا جہاں گزشتہ سیزن میں انھیں خاتون رپورٹر کو ہراساں کرنے کے الزام میں جرمانہ بھی کیا گیا تھا جبکہ دیگر ٹیموں نے ان کو لینے سے انکار کیا ۔سیمی نے اپنی حمایت کا یقین دلاتے ہوئے کہا کہ میں کرکٹ کے میدان میں ان کی خدمات پر کرس گیل کی ہمیشہ حمایت کرتا ہوں۔انہوں نے کہاکہ میں مانتا ہوں کہ ہمارے اوپر ذمہ داری ہے اور لوگ دیکھتے ہیں تاہم میرے خیال میں کرس گیل بعض اخباروں کی سرخیوں کا نشانہ ہوتے ہیں۔ڈیرن سیمی نے ویسٹ انڈیز کرکٹ کے حکام اور کھلاڑیوں کو دعوت دی کہ وہ اپنی انا کو قربان کرکے خطے میں کرکٹ کے فروغ کیلئے کام کریں۔