متنازعہ ماڈل و اداکارہ قندیل بلوچ بھائی کے ہاتھوں قتل ‎

اسلام آباد(زمونگ سوات آن لائن نیوز) متنازعہ ماڈل و اداکارہ قندیل بلوچ کو بھائی نے غیرت کے نام پر قتل کر دیا۔ قندیل بلوچ گرین ٹاؤن مظفر گڑھ میں کرائے کے گھر میں رہائش پذیر تھیں۔آر پی او ملتان نے واقعے کی تصدیق کی ہے ۔ ذرائع کے مطابق قندیل بلوچ کو گلا دبا کر قتل کیا گیا ہے۔ پولیس نے ملزم بھائی کو گرفتار کر لیا جس نے یہ بیان دیا کہ اس کی بہن آئے دن ٹی وی پر آ کر ہماری عزت کی دھجیاں بکھیرتی تھی۔جبکہ دوسری طرف قندیل بلوچ کے قتل پر سگے بھائی نے تہلکہ خیز انکشافات کر دیئے‘ قندیل بلوچ کے بھائی کا کہنا ہے کہ قندیل بلوچ نے ہماری عزت خاک میں ملا دی تھی۔ اس وجہ سے اسے قتل کر دیا۔ ہمیں محلے میں سب لوگ باتیں سناتے تھے اور شہر بھر میں ہمارا جینا دوبھر ہو گیا تھا۔تفصیل کے مطابق قندیل بلوچ قتل سے قبل اپنے کرائے کے گھر میں موجود تھیں جہاں ان کے حقیقی بھائی نے انہیں قتل کر دیا۔ قتل کے وقت قندیل بلوچ بھائی کو اقدام سے باز رکھنے کیلئے شدید مزاحمت بھی کرتی رہیں لیکن ان کی کوششیں بار آور ثابت نہ ہو سکیں۔ پولیس ذرائع کا کہنا ہے کہ ماڈل قندیل بلوچ کو مبینہ طور پر بھائی نے گلا دبا کر قتل کر دیا ہے تاہم مظفر آباد کی پولیس اور ریسکیو ادارے بھی موقع پر پہنچ گئے ہیں۔واقعے کے بعد ملزم موقع سے فرار ہو گیا جس کی گرفتاری کیلئے چھاپے مارے جا رہے ہیں۔
ذرائع کا کہنا ہے کہ قندیل بلوچ چاند رات سے مظفر آباد کے علاقے گرین ٹاؤن میں اپنے گھر پر مقیم تھیں۔قندیل بلوچ نے گرین ٹاؤن میں گھر کرایے پر لیا ہوا تھا تاہم ذرائع کا کہنا ہے کہ قندیل بلوچ کے بھائی نے غیرت کے نام پر بہن کو قتل کیا ہے۔ قندیل بلوچ کی ڈیڈ باڈی کمرے میں ہی موجود ہے جسے پولیس نے اپنے قبضے میں لے لیا ہے اور پوسٹ مارٹم کیلے ہسپتال منتقل کیا جائے گا۔ذرائع نے بتایا کہ ماڈل قندیل بلوچ کو سکیورٹی خدشات موجود تھے جس پر انہوں نے وزارت داخلہ سے سکیورٹی بھی مانگی تھی مگر انہیں سکیورٹی فراہم نہیں کی گئی۔قندیل بلوچ کے والد نے اہم انکشاف کرتے ہوئے کہا ہے کہ ان کے بیٹے وسیم نے قندیل بلوچ کو گلہ دباکر قتل کیا ہے ، جس کی اطلاع پولیس کو دی گئی ہے ۔ سی پی او ملتان نے قندیل بلوچ کے والد اور والدہ سے ملاقات کے بعد بتایا ہے کہ قندیل کو گلہ دبا کر قتل کیا گیا ہے اور اس کاروائی کی اطلاع قندیل کے والد عظیم نے پولیس کو ٹیلی فون پر دے دی تھی۔ قندیل بلوچ کے قتل سے شہر بھر میں ہلچل مچ گئی ۔