بھارت کا بڑا نقصان بحری جہا زغر ق ہو گیا

شارجہ/مسقط(زمونگ سوات آن لائن نیوز)اشیائے خوراک اور موٹرگاڑیوں سے لدا یمن جانے والا ایک بھارتی مال بردار بحری جہاز عمان کے ساحلوں کے قریب سمندر میں ڈوب گیا۔بھارتی میڈیا کے مطابق یہ بھارتی کارگو شپ بحیرہ عرب میں غرق ہو گیا۔یمن جانے والے اس بھارتی مال بردار بحری جہاز پر سامان شارجہ کی بندرگاہ سے لادا گیا تھا، اس حادثے میں کوئی جانی نقصان نہیں ہوا۔ عمان کی سرکاری نیوز ایجنسی نے ملکی پولیس اور ساحلی علاقوں میں ماہی گیری کرنے والے مقامی باشندوں کا حوالہ دیتے ہوئے بتایا کہ اس مال بردار بحری جہاز پر عملے کے گیارہ افراد سوار تھے، جو سب کے سب بروقت بچا لیے گئے۔اس بحری جہاز پر اشیائے خوراک، 69 گاڑیاں، گاڑیوں کے ہزاروں ٹائر اور بہت سا انجن آئل لدا ہوا تھا۔
عمانی نیوز ایجنسی نے بتایا کہ اس شپ پر یہ سامان متحدہ عرب امارات میں شارجہ کی بندرگاہ سے لادا گیا تھا۔یہ بھارتی بحری جہاز شمال مشرقی عمان کے ساحلی شہر السویق سے قریب 15 سمندری میل کے فاصلے پر بحیرہ عرب کے پانیوں میں ایک بظاہر ’تکنیکی خرابی‘ کی وجہ سے ڈوب گیا۔متحدہ عرب امارات کے انگریزی روزنامے کے مطابق یہ بھارتی کارگو شپ اس لیے ڈوبا کہ اس پر مقررہ حد سے بہت زیادہ سامان لدا ہوا تھا۔ یہ بحری جہاز اپنے سامان کے ساتھ شارجہ سے جنوب مشرقی یمن کے بندرگاہی شہر المکلہ کی طرف سفر پر تھا۔ اس کارگو شپ کی غرقابی کے بارے میں اس کی مالک کمپنی یا بھارتی حکام کی طرف سے آخری رپورٹیں آنے تک کچھ نہیں کہا گیا تھا۔