نواز شریف سے ہزاروں اختلافات ہونگے، لیکن ملکی مفاد میں میرا وہی موقف ہے جو حکومت کا ہے

اسلام آباد،ٹیکسلا(زمونگ سوات آن لائن نیوز) پاکستان تحریک انصاف کے چیرمین عمران خا ن نے کہاہے کہ میرے نوازشریف اورحکومت سے ہزاروں اختلافات ہونگے لیکن مقبوضہ کشمیراوربھارت کی طرف سے جنگ کی دھمکیوں کے بارے میں میراان سے کوئی اختلاف نہیں ہے ۔میراموقف وہی ہے جوحکومت کاہے ۔ٹیکسلامیں خطاب کرتے ہوئے عمران خان نے کہاکہ مودی مقبوضہ کشمیرکے عوام کاحق آزادی دباناچاہتے ہیں لیکن ان کومعلوم ہوناچاہیے کہ روس بھی طاقت کے زورپرافغان عوام کوغلام نہیں بناسکاتھااوراب پوری قوم پاک فوج کے ساتھ کھڑی ہے اوراگربھارت نے کسی طرح کوئی گڑبڑکی تواس کومہنگی پڑے گی ۔انہوں نے کہاکہ پاک فوج وطن کی حفاظت کے لئے تیارکھڑی ہے اورہمارادفاع مضبوط ہے ۔انہو ں نے کہاکہ کشمیرکی آزادی اب قریب ہے اس کےلئے ہمارے کسی سے کوئی اختلافات نہیں ۔عمران خان نے اس موقع پرحکومت کوتنقیدکانشانہ بناتے ہوئے کہاکہ اگرادارے مضبوط ہونگے توسربراہ مملکت بھی کرپشن نہیں کرسکے گا۔انہوں نے کہاکہ ہمیں نہ توکہیں سے انصاف ملاتوہم احتجاج کاراستہ اپنایاجوکہ ہماراجمہوری حق ہے ۔اس سے قبل پارٹی کے ضلعی صدورکے اجلاس سے خطاب کرتے ہوئے عمران خان نے کہا ہے کہ 30 ستمبر کو رائیونڈ کی جانب تاریخی مارچ کرینگے ،حکمران کسی بھی مہذب ،جمہوری اقدار پر یقین نہیں رکھتے،ذاتی مفادات پس پشت ڈال کر متحد ہونے ،فیصلہ کن صف بندی کا وقت آن پہنچا ہے،قوم کے مستقبل کو ادنیٰ مفادات کی بھینٹ نہیں چڑھایا جاسکتا۔وقت کا تقاضا ہے کہ ہم قوم کی آواز بنیں اور غریب قوم کی لوٹی گئی دولت کا حساب لیں‘ انہوں نے کہا کہ رائیونڈ میں قوم کی ترجمانی کرتے ہوئے شریف خاندان سے لوٹ مار کا حساب مانگیں گے۔ذمہ داران بلاتفریق تمام شعبہ ہائے زندگی سے وابستہ افراد تک تحریک کا پیغام پہنچائیں۔ عمران خان نے کہا کہ حکمران خاندان اداروں کی تباہی کے عوض احتساب سے فرارچاہتے ہیں۔