’’اپنا کام اور اپنی فلم انڈسٹری اپنے پاس رکھو‘‘ مجھے پاکستان عزیز ہے‘ فواد خان بھارت چھوڑ آئے

نئی دہلی(زمونگ سوات آن لائن نیوز) ہندو انتہا پسند تنظیموں کی جانب سے ملنے والی سنگین دھمکیوں کے باعث فواد خان بھارت چھوڑ کر واپس پاکستان چلے گئے ہیں۔اڑی حملے کے بعد سے بھارت کی جانب سے پاکستان پر بے دریغ الزامات کا سلسلہ جاری ہے جب کہ بھارتی ہندو انتہا پسندوں نے تو پاکستانی فنکاروں کو 48 گھنٹے میں بھارت چھوڑنے کی دھمکیاں بھی دیدی ہیں اور اب بھارتی میڈیا اس بات کا دعویٰ کررہا ہے کہ پاکستانی اداکار فواد خان نے بھارت چھوڑدیا ہے۔بھارتی میڈیا رپورٹس کے مطابق پاکستانی اداکار فواد خان ہندو انتہا پسند تنظیم کی دھمکیوں کے بعد بھارت چھوڑ کر پاکستان واپس چلے آئے ہیں اور فی الحال ان کا جلد واپسی کا کوئی ارادہ نہیں۔ رپورٹ میں کہا گیا ہے کہ فواد خان کو اپنے دوسرے بچے کی پیدائش کے سلسلے میں پاکستان تو جانا ہی تھا لیکن اب واپسی کے امکانات بہت کم لگ رہے ہیں۔واضح رہے کہ گزشتہ دنوں ہندو انتہاپسند جماعت مہاراشٹرا نونرمان سینا نے پاکستانی فنکاروں کو 48 گھنٹے میں ملک چھوڑنے کی دھمکی دیتے ہوئے کہا کہ تھا کہ اگرانہوں نے بھارت نہ چھوڑا تو سنگین نتائج بھگتنے کے لئے تیار ہوجائیں۔