سوات ، جماعت اسلامی کے تحت ’’پاکستان زندہ آباد امریکہ مردہ باد مہم‘‘ احتجاجی مظاہرہ

سوات(زمونگ سوات ڈاٹ کام)جماعت اسلامی ضلع سوات کے تحت ’’پاکستان زندہ باد امریکہ مردہ باد مہم ‘‘کے تحت پاکستان بارے امریکی پالیسیوں کے خلاف مینگورہ سٹی میں زبردست احتجاجی مظاہرہ کیا گیا جس میں بڑی تعداد میں عوام نے شرکت کی ۔مظاہرین نے پاکستان زندہ باد امریکہ مردہ باد کے فلک شکاف نعرے لگائے ۔ مظاہرین جماعت اسلامی سوات ضلعی سیکرٹریٹ ادارہ الخدمت سے ریلی کی صورت میں گرین چوک تک گئے۔ گرین چوک میں مظاہرین سے خطاب کرتے ہوئے نائب امیر جماعت اسلامی ضلع سوات محمدابراہیم شاہ نے کہا کہ پاکستان ایک خود مختار ملک ہے ۔امریکی صدر ٹرمپ کی ڈکٹیشن کو ٹھوکر اور پاکستان بارے امریکی پالیسیوں کو مسترد کرتے ہیں ۔ پاکستانی حکمران فوری طور پر امریکی سفیر کو طلب کرکے جواب طلب کریں ۔انہوں نے کہا کہ امریکہ افغانستان میں شکست کھا چکا ہے ۔اب بھاگنے کے لئے راستے کی تلاش میں ہے ۔ مظاہرین سے امیر جماعت اسلامی زون پی کے 80مینگورہ حافظ بخت امین ایڈوکیٹ نے بھی خطاب کیا ۔