پاکستان نے جنوبی افریقہ کو چوتھے ایک روزہ میچ میں 8 وکٹوں سے شکست دیکر 5 میچز کی سیریز 2۔2 سے برابر کردی

جوہانسبرگ(زمونگ سوات ڈاٹ کام)پاکستان نے جنوبی افریقہ کو چوتھے ایک روزہ میچ میں 8 وکٹوں سے شکست دیکر 5 میچز کی سیریز 2۔2 سے برابر کردی، ڈوپلیسی اور ہاشم آملہ کی 101 رنز کی شراکت ہی بولنگ لائن پر حاوی رہی، اس کے سوا جنوبی افریقی بیٹنگ لائن ریت کی دیوار ثابت ہوئی اور 6 بلے باز ڈبل فیگر میں بھی شامل نہ ہوسکے ، میزبان ٹیم 41اوورز میں 164رنز بنا سکی ٗپاکستانی ٹیم نے ہدف 31.3اوورز میں حاصل کرلیا ، امام الحق نے گیندوں پر ایک چھکے اور 6 چوکوں کی مدد سے 71 رنز کی اننگز کھیلی ، بابر اعظم 41 رنز کے ساتھ ناٹ آؤٹ رہے، عثمان شنواری نے چار وکٹیں حاصل کیں، مین آف دی میچ قرار پائے ۔ اتوار کو جوہانسبرگ میں بریسٹ کینسر کی آگاہی کے سلسلے میں گلابی وردی میں کھیلے گئے میچ میں پاکستان ٹیم کے کپتان شعیب ملک نے ٹاس جیت کر پہلے میزبان ٹیم کو بیٹنگ کی دعوت دی تو جنوبی افریقی بلے بازوں نے مایوس کن انداز میں آغاز کیا تاہم کپتان فاف ڈوپلیسی اور ہاشم آملہ کی زبردست شراکت نے ٹیم کو سہارا دیا۔دونوں بلے بازوں کی 101 رنز کی شراکت ہی بولنگ لائن پر حاوی رہی، اس کے سوا جنوبی افریقی بیٹنگ لائن ریت کی دیوار ثابت ہوئی اور 6 بلے باز ڈبل فیگر میں بھی شامل نہ ہوسکے۔فاف ڈوپلیسی 57 اور ہاشم آملہ 59 رنز کے ساتھ نمایاں رہے، ریسی ڈوسن 18 اور فیلوک وایو 11 رنز بنا کر آؤٹ ہوئے، 156 کے مجموعی اسکور پر عثمان شنواری نے اپنے ایک ہی اوور میں تین بلے بازوں کو پویلین کی راہ دکھائی۔پاکستان کی جانب سے عثمان شنواری نے 4، شاہین شاہ آفریدی اور شاداب خان نے 2،2 جبکہ محمد عامر اور عماد وسیم نے ایک ایک وکٹ حاصل کی۔ میزبان ٹیم 41 اوورز میں 164 رنز بنا کر آؤٹ ہوئی جب کہ پاکستان نے ہدف باآسانی 31.3 اوورز میں حاصل کیا۔ہدف کے تعاقب میں امام الحق اور فخر زمان نے اننگز کا پراعتماد انداز میں آغاز کیا اور پہلی وکٹ پر 70 رنز کی شراکت قائم کی تو فخر 44 رنز بنا کر عمران طاہر کا شکار بن گئے۔فخر زمان نے اپنی اننگز میں 7 چوکے لگائے، دوسری وکٹ پر امام الحق اور بابر اعظم نے جنوبی افریقی بولروں کی ایک نہ چلنے دی اور گراؤنڈ کے چاروں اطراف شاندار اسٹروکس کھیلے۔میچ جیتنے کیلئے قومی ٹیم کو صرف ایک رن درکار تھا کہ امام الحق بڑا اسٹروک کھیلنے کی کوشش میں وکٹ کے پیچھے کیچ آؤٹ ہوئے، انہوں نے 91 گیندوں پر ایک چھکے اور 6 چوکوں کی مدد سے 71 رنز کی اننگز کھیلی جبکہ بابر اعظم 41 رنز کے ساتھ ناٹ آؤٹ رہے۔دونوں ٹیموں کے درمیان فیصلہ کن پانچواں اور آخری ایک روزہ میچ 30 جنوری کو کھیلا جائے گا اس کے بعد دونوں ٹیموں کے درمیان تین ٹی ٹونٹی انٹرنیشنل میچوں کی سیریز کھیلی جائے گی۔یاد رہے کہ آئی سی سی کی جانب سے نسلی پرستانہ جملوں پر کارروائی کرتے ہوئے کپتان سرفراز احمد پر 4 میچز کی پابندی عائد کردی گئی ہے جس کے باعث شعیب ملک نے ٹیم کی قیادت کے فرائض انجام دئیے۔سرفراز احمد کی جگہ محمد رضوان کو ٹیم میں شامل کیا گیا اور حسن علی کی جگہ عثمان خان شنواری گیارہ رکنی ٹیم کا حصہ تھے۔