نوازشریف علاج کیلئے بیرون ملک کب روانہ ہونگے؟ن لیگ نے تاریخ کا اعلان کردیا

لاہور(زمونگ سوات ڈاٹ کام)پاکستان مسلم لیگ(ن ) کی مرکزی سیکرٹری اطلاعات مریم اورنگزیب نے کہا ہے کہ محمد نواز شریف منگل کو بیرون ملک علاج کے لیے روانہ ہوں گے۔ بیان میں انہوں نے کہاکہ سابق وزیر اعظم محمد نواز شریف کو لیجانے کے لئے ائیر ایمبولینس منگل کی صبح پہنچے گی ۔ ڈاکٹرز نے محمد نواز شریف کا دوبارہ تفصیلی معائنہ کیا ہے اور انہیں سفر کے قابل بنانے کے لئے ڈاکٹرز نے آپس میں صلاح مشورہ کیا۔سٹیرائیڈزکی ہائی ڈوز ز دینے کا عمل جاری ہے تاکہ پلیٹ لیٹس کی مقدار سفر کے قابل ہو سکے ۔ہائی بلڈ شوگر،ہارٹ اور دیگر طبی خطرات کو کم سے کم سطح پر لانے کے لئے بھی ادویات دی جا رہی ہیں ،ڈاکٹرز ایسی محفوظ طبی حکمت عملی پر کاربند ہیں جس سے محمد نواز شریف بحفاظت سفر کر سکیں۔انہوں نے کہا کہ قوم سے دعا کی خصوصی اپیل ہے ،دعا کریں کہ محمد نواز شریف کا سفر بخیر یت رہے اور اللہ تعالی ان کو صحت کاملہ عطا فرمائے۔