موجودہ حکومت پاکستان کی تاریخ میں ناکام ترین، نااہل ترین اور نالائق ترین حکومت ہے،سراج الحق

سوات (زمونگ سوات ڈاٹ کام) جماعت اسلامی پاکستان کے امیر سنیٹر سراج الحق نے کہا ہے کہ موجودہ حکومت پاکستان کی تاریخ میں ناکام ترین، نااہل ترین اور نالائق ترین حکومت ہے،جھوٹ نہ بولنے والوں نے 800 دنوں میں 800 بار سے زیادہ جھوٹ بول چکے ہیں آج اس حکومت نے جھوٹ کو یوٹرن کا نام دیکر بتایاہے کہ جتنا بڑالیڈر ہوتا ہے اتنا بڑا یوٹرین لیتا ہے۔ عمران خان نے کہا تھاکہ اگر لوگوں نے میرے خلاف احتجاج کیا تو ہم حکومت چھوڑ دینگے ہم انہیں یاد کرانا چاہتے ہیں کہ اب چترال سے کراچی تک گلی گلی میں شور ہے لوگ اپ کی حکومت پر لعنت بھیج رہے ہیں اب آپ نے قوم کے ساتھ وعدہ پورا کرنا ہے اب آپ کو اسلام آباد وزیراعظم ہاؤس میں وزارت عظمیٰ کی کرسی پر برا جماں رہنا آپ کے کہنے کے مطابق ناجائز ہے آپ نے لوگوں سے جھوٹ بولا تھا کہ میں گورنر ہاؤسز سے یونیورسٹیاں بناؤنگا آپ ایک گورنر ہاؤس دکھائے جس میں یونیورسٹی قائم کی گئی ہو۔ اپ نے گھروں کی تعمیر، ایک کروڑ عوام کو روزگار دینے کے وعدے کئے مگر 35 لاکھ افراد کو بیروزگار کیا۔ آپ نے وعدہ کیا تھا کہ میں پاکستان کو اسلامی ریاست بناؤنگا لیکن آپ کی حکومت میں مساجد میں فلمی اداکاروں نے شوٹنگ شروع کر رکھی ہے مدارس، مساجد کی توہین، رسول اللہ ؐ کی شان میں مسلسل گستاخیاں، 800 دنوں میں اپ نے ریاست مدینہ کی طرف کونسا قدم اُٹھایا۔ آپ کے آنے کے بعد بھارت نے کشمیر پر قبضہ کیا 73 سالہ کشمیری جدوجہد کو بے غیرتی اور بے حرمتی کیساتھ سبوتاژ کیا، آج خارجہ محاذ پر حکومت ناکام ہو چکی ہے امن و امان اور معیشت کا بیڑہ غرق کر دیا ہے ان خیالات کا اظہار انہوں نے گراسی گراؤنڈ میں جلسہ عام سے خطاب کرتے ہوئے کیا اس سے قبل جماعت اسلامی صوبہ خیبر پختونخو اکے امیر مشتاق احمد خان، ضلعی امیر حمید الحق، سابق ضلعی امیر محمد امین، ضلع سوات کے جنرل سیکرٹری ڈاکٹر خالد فاروق اور دیگر نے بھی خطاب کیا جلسہ عام سے خطاب کرتے ہوئے سراج الحق کا کہنا تھا کہ موجودہ وزیراعظم نے کہا تھا کہ میرے ساتھ معاشی ماہرین ہے 200 سکالرز اور ماہرین تودرکنار آپ کے ساتھ 200 مرغیاں بھی نہیں ہے اسلئے آج انڈوں، مرغیوں، دودھ، آٹے، دوائی، گوشت کی قیمتوں میں اضافہ ہوا ہے آپ کی حکومت میں موت سستی ہوگئی ہے عصمت دری سستی ہو چکی ہے ان نا اہلوں نے قوم کو مایوس کیا۔ انہوں نے کہا کہ پی ٹی آئیء میں پیپلزپارٹی، مشرف، مسلم لیگ کے لوگ ہیں انہی لوگوں کواکٹھا کرکے پی ٹی آئی بنائی گئی آج پی ڈی ایم اور پی ٹی آئی کے مابین غریب، خارجہ پالیسی، کشمیر کے مسئلے، داخلہ پالیسی، تعلیمی پالیسی پر اختلاف نہیں ہے اختلاف اس چیز پر ہے کہ آپ کیوں گھوڑے پر سوار ہے اس وجہ سے پی ڈی ایم کا ساتھ نہیں دیا کیونکہ ان کے مقاصد میں شریعت کا نفاذ شامل نہیں جس اتحاد اور مومن کا مقصد ذاتی مفادات ہو ایسے اتحاد میں شامل نہیں ہے ہم عوام کے ساتھ ہیں ہم عوام کیلئے لڑ رہے ہیں ہم غریب کی بات کر رہے ہیں ہم مزدور کی بات کر رہے ہیں ہم کاشتکاروں، غریب طالب علموں، بیروزگار نوجوان، مظلوم ماؤں بہنوں بیٹیوں کی بات کر رہے ہیں انشاء اللہ جماعت اسلامی تنہا جدوجہد میں کامیاب ہو گی، اس وقت سب سے اہم مسئلہ سیاسی جماعتوں کا آپس میں ڈائیلاگ ہے الیکشن کو شفاف اور الیکشن کمیشن کو آزاد کرانا ہے ووٹ کو محفوظ بنانا ہے اس انتظامیہ کے تحت الیکشن کرانا اپنے آپ کو دھوکہ دینے کے مترادف ہے میں تمام سیاسی جماعتوں کے ورکرز سے کہتا ہوں کہ خدا کیلئے جاگیرداروں، ٹھیکہ داروں، مافیا کی سیاست سے غریب سیاسی ورکر کو کچھ نہیں ملے گا اگر آپ چاہتے ہیں کہ ملک ترقی کریں سول بالادستی قائم ہو، حقیقی جمہوریت قائم ہو، اگر آپ چاہتے ہیں کہ عدالتوں میں آپ کو انصاف ملے اگر آپ چاہتے ہیں کہ غریب کے بیٹے کو اچھے اداروں میں تعلیم ملے ہسپتالوں میں مفت علاج ملے ایک ہی راستہ ہے کہ اس ملک میں نظام مصطفی قائم ہو اور جماعت اسلامی کی حکومت قائم ہواس میں آپ لوگوں کو میرا ساتھ دینا چاہئے انہوں نے کہا کہ ووٹ اور زندہ باد مردہ باد کے نعرے عوام لگاتے ہیں اور الیکشن نتائج میں پھر وہی پرانے ڈاکو اسمبلی پہنچ جاتے ہیں ہم ایسا نظام نہیں چاہتے، گراسی گراؤنڈ میں دو جلسے پچھلے دنوں ہو چکے ہیں پورے ڈویژن سے لوگوں کو اکٹھا کیا لیکن ہم نے صرف ضلع سوات کی سطح پر گراسی گراؤنڈ کو لوگوں سے بھر دیا ہے سوات کے عوام نے ثابت کر دیا ہے کہ وہ ہمارے ساتھ ہیں۔ تاریخ کا یہ پہلاواقعہ تھا کہ سوات کے لوگوں کو بے گھر کر دیا گیا، یہاں کے بے گناہ عوام کیساتھ خون کی ہولی کھیلی گئی، ان لوگوں اور عوام کی قربانیوں کے نتیجے میں پچھلے حکومتوں اور موجودہ حکومت نے سوات کے ساتھ وفانہیں کیا اور وہ نہیں دیا جو یہاں ہونا چاہئے آج بھی یونیورسٹی زیر تعمیر ہے محمد امین نے یہاں پر ہسپتال کی بنیاد رکھی 15 سال میں اس ہسپتال کو چالو نہ کر سکے، ملاکنڈ ڈویژن کے لوگوں کے ساتھ دھوکہ کیا گیا،اس وطن کے تمام مسائل کا حل نظام مصطفی میں ہے انہوں نے کہا کہ موجودہ حکومت نے احتساب کرنے کا کہا تھا مگر کسی سے احتساب نہیں کیا نہ سیاستدانوں، سابق جرنیلوں سے لوٹی ہوئی رقوم واپس کی احتساب کو اب انتقام کیلئے استعمال کر رہے ہیں اگر ہمیں اختیار دیا گیا تو بلا تفریق احتساب جماعت اسلامی کرے گی تمام ڈاکوؤں کی جگہ جیل ہو گی، تمام سیاستدانوں سے حساب کتاب کریں گے، ہمارے آگے پیچھے کوئی فائل نہیں اگر موقع ملا توملک کو اسلامی نظام اور شریعت کے مطابق چلائیں گے انہوں نے کہا کہ بے غیرت حکومت نے فرانس کے سفیر کو ملک بدر نہیں کیا اور نہ ہی سرکاری سطح پر اُن کے مصنوعات کا بائیکاٹ کیا، ہمیں موقع ملا تو اسلامی اور خوشحال پاکستان میں غریبوں کیلئے مفت علاج معالجہ، تعلیم اور کتب مفت دینگے،سرکاری اراضیات جو بنجر پڑی ہے اس کو غریبوں میں تقسیم کریں گے تاکہ وہ اپنے لئے گھر بنا سکے اور اپنی زمینوں پر فصل اُگا سکے، عدالتوں میں مظلوموں کوریاست انصاف فراہم کرے گی، ہم اس وطن میں شرعی نظام چاہتے ہیں جس اپوزیشن تحریک کی سربراہی پی پی پی اور مسلم لیگ ن کے قائدین کر رہے ہو اُن کی حکومتیں ہم نے دیکھی ہے وہ صرف اپنی پراپرٹی اور بینک بیلنس میں اضافہ کرتے ہیں اس کے ساتھ عوام کیلئے کوئی پروگرام نہیں ہے۔ چترال سے کراچی تک جماعت اسلامی تحریک چلائے گی، بعض لوگ کہتے ہیں کہ جماعت اسلامی سے امریکہ ناراض ہے لیکن ہمارے ساتھ اللہ تعالیٰ اور غریب عوام کی مدد ہے ہمیں امریکہ کی نہیں اللہ تعالیٰ کی مدد کی ضرورت ہے۔